Rapidobrunch: “WE MEUGE WEER” .
Det kins se waal zegge nao 2 jaor ut sportjaor zónder brunch te mótte starte.
Un niej jaor, un nieje lokatie en netuurlik nieje planne.
Ózze veurzitter Rob haet de planne beej zien welkómswoord óet de deuk gedaon.
Met 50 persoeëne op ut nieje sportjaor tooste is nog altiéd un leuke activiteit.
Zeker op zo’n lokatie in “ut hert” van Bliérick.
De naam van ut restaurant is hiel toepasselik “ UT HERT” geneump.
Dao hesse , zoeë te zeen, waal vuuel variatie in!
Un gezellige lokatie met voldoonde parkeerplekke in de buurt.
Joyce had de kersversiering nog efkes laote staon wat toch altiéd un bepaolde sfeer guf.
Daorum hadde de vaste versier-vreejwilligers daags veur de brunch unne vreeje Zaoterdaag.
Zelfs Rob,en Helmie kôste de scholk thoés laote en hoofde allein maar óntspanne te aete.
D’r waar wat werms, wat gezónds, wat kluntjes- en wat krintemik.
Zelfs nog un toetje veur de leefhebbers.
Ik gluif det nemes mier ‘n dieet had, ut ging vlot op.
Ze kôste aaf en toe zelfs ut beejvölle van ut buffet neet beejhalde.
Deze kier gen spelkes of unne goochelaer maar gewoeën beejproate en aaf en toe
van stool wissele um met andere brunchleefhebbers te kinne kletse.
We hadde André Rieu nog gebeld veur wat entertainment maar dae meus nog zoeëvuuel inhaole dit jaor,
Volgende kieër meschiens!
Trouwens Wiek had ós op de Cuisine al behuurlik getrakteerd op spelkes en quizen.
Maar det is veur um gen straf,
Asse gen zitvleis hes is det dé meneer um dien fantasie kwiét te waere.
Ik wins óg allemaol:
Unne sportieve start in Januari.
Leuke vastelaovend in Februari.
Óetröste in Maart
Gen zörg in April
Veurjaorskriebels in Mei
Genete van de zomer van Juni t/m September.
Vuuel kastanjes en eikels in Oktober en November
Haopelik….. dankbaarheid in December veur ‘n prachtig en gezónd 2023.
Elly van Elswijk