Leef Rapidiane….

Leef Rapidiane die mei zien gegaon nao Düsseldorf.

Ein kort verslaag van ‘t 34ste Rapidoweekend.

Wat hebbe we ein moeëj weekend in Düsseldorf gehad. Wat eine gezellige groep um ein weekend mei op paad te gaon.
De reis waas gezellig, zoeë met idderein in de bus. ’t Hotel waas good. ’t Ontbijt waas neet te euvertreffe. ’t Brauhaus waas wat gehurig, maar ’t aete waas d’r good en ’t Frankenheimer Alt waas kalt en lekker.
’t Waas jaomer det Hay neet mei kós vanwaege gezóndheidsprobleme.

We hadde dit jaor zelfs good waer. Op vriedaag ein lekker zunke. Ech terrasjeswaer, wao haos idderein gebroek van haet gemak. ’s Aoves nao ’t aete haet idderein weer ens good kinne beejpraote, de meiste hadde zich al lang neet mier gezeen.

De zaoterdaag, druueg, ein bietje fris, maar fijn waer um ein wandeling nao de “Altstadt “ te make. Wat ware d’r weer stómme spelkes; dreej touwe “ontvlegte”, eine körk oet ein plestik fles stampe, ein estafette met 4 strandbel en met eine veiligheidshelm eine bal rónddreie en flesse umver kaegele. Zoeë-iets hadde ze in Düsseldorf nog noeëts gezeen. En dan die opdrach um iets hiel goodkoups mei te bringe, met kassabon nog wal.

Verschillende minse hebbe zich in Brauhaus Uerige ein bietje gesteurd aan ’t gedraag van de obers, wat ware die vrech. En dan zette ze dich ouk nog óngevraog ein glaas Alt op de taofel en pats dao hesse ouk alweer ein streepke op ’t viltje.
“Plaatsvervangend” beeje weej óg dao ós veróntschöldiginge veur aan. Wééj zien det schöld. Weej zien vergaete eur te zegge det zeej belaef taege óg meuste zien. Zeej deje gewoeën zoeëas zeej altied doon.

De zaoterdaagaovend waas weer as vanouds. Nao ’t aete haet Frans de oetslaag van de wandeling bekind gemak. As pries kreeg de winnende ploog ein fles Franken-heimer alt.

De “Golden Girls” hadde eine schitterende “Sister Act”. Wat ware ze allemaol zóndig gewaes. Zelfs de Hiér Abt had eur dao neet veur kinne behoede. ’t Veel geweldig in de smaak en de toeschouwers hele neet op met klappe. Frans haet mótte ingriepe.
Later kwaam Wiek met de verrassing van de aovend. Alle groepe meuste nog efkes creatief waere. Iddere groep kreeg ein pepeerke wao de opdrach opstónd:
“Beeld met behulp van krantepepeer en plekband ein van de figure oet die op ’t breefke staon”.
Frans en Theo meuste jurere.
Noow dao zoog se mich wat. Ein gelaarsde kat die ouk Ivanhoe had kinne zien of ridder Kunibald. Eine vastelaovesprins van de Wortelepin, dae ouk van de Poerkers of de Worteleschrabbers kós zien. Eine vrouwelike prins, dus dae is oet ’t jaor 2030, want dan kinne ouk vrouwe prins waere beej de wortelepin. Quasimodo van de Notre Dame oet Peries, net ech, met eine bochel, ein lempke en lange haor. Groep 2 had gen keus kinne make oet de name en beeldde ze dus maar allemaol oet.

Zóndaagmorge nao ein heerlik ontbijt, de kóffers nao ónder en wachte op de bus. D’r meus nog ein groepsfoto waere gemak. Wiek vónd ein van de maedjes van de bedening bereid um die foto te make.
En um 11.00 oor kwaam de bus, die ós fijn zonder probleme weer truuk nao Blierick brach.
Umdet neet idderein op de groepsfoto in Düsseldorf stónd, hebbe we die in Blierick nog efkes opnie gemak. Noow kós Hay, dae ós op stond te wachte, ouk op de foto.

Hay en ik wille van dit weekend ein videofilm make. De vraog aan óg is dan ouk of geej foto’s en filmkes die geej gemak heb, wilt deile met Hay en mich.
Steur ze maar via Wetransfer. Taege de tied det ze klaor is krieg idderein ein mailtje.

As organisasie wille weej óg bedanke veur ógge inzet op ’t weekend. Weej hebbe d’r weer vuuel plezeer in gehad um ’t te organisere. Netuurlik ouk ein danke veur ózze ‘
“assistent” Wiek. Zónder um waas ’t ein stök meujeliker gewaes.
 En as dan idderein zich good haet geammezeerd, dan veult det veur ós weer good.

Danke allemaol,

de deserteur (met hiel vuuel pien in ’t hert) Hay
de gammele, maar blieje Frans
de nieje Wiek

en

de hiel blieje, maar muuuuuge Theo.

1 gedachte over “Leef Rapidiane….”

Laat een reactie achter