6 reacties / Elly's Rubriek / Door

We ginge truuk naor de Middelieuwe in ut bijna kleinste stedje van Pruuses.
We mochte logere in Herberg Daniëlshof in Alt- Kaster, schoeën ingerich, good verzórg en klasse aete.
Alt-Kaster haet un lange geschiedenis die truuk geit naor de 16e ieuw.

Volges de legende veranderde Peter Stump ’s-nachs in unne “Waerwolf”  D’r ware nogal wat bós in de umgaeving en volges de euverlevering  had de Waerwolf 16 manne, zwangere vrouwe en zelfs kinder s’nachs of s’aoves laat meigelok, misbroek en toen vermoord. De vruuegs dich aaf wat zwangere vrouwe en kinder s’nachs in die bös te zeuke hadde. Maar in daen tied gluifde de minse alles wat verteld woort, gelökkig is det noow un bietje veranderd?!

Maar wáor of neet wáor Peter haet ut neet euverlaef, hae woort op ’n Middelieuwse meneer gestraf.
Midde op ut mertplein woort hae vasgebónde op un groeët raad, toen ónthoof en tenslotte verbrand.
Wat erg vuuel van ut “gooje” as se ut mich vruuegs, jao ut waar un gezellig stel in daen tied.

Truuk naor 2019; weej woorte dus naor Alt-Kastel gelok door de Gebrüder Smeets umdet die zich gaer verkleije as Schout en Schepene.
Elke groep kreeg un Middelieuws beroep b.v. Rattenvangers, Marskramers, Doodbidders, Chirurgijnen enz. Dus wat duis se dan, de kieks ens in de vastelaoveskas en goeis van alles in de auto. De wets noeits wie det van pas kin kómme.

Nao un óetstaekend diner woort de aovend geäöpend door de beschermhier van Alt-Kaster; Sankt Georg. Hae had genne tied gehad um naor de kapper te gaon, de haor zote um wat in de waeg. Zaoterdaagmorge, nao ’n klasse óntbijt, begóste we met un poetje kaegele bergop op de binneplaats. In de Middelieuwe ginge vuuel dinger bergop heb ik mich laote vertelle. Daonao un wandeltoch van 6 km. door de bös want ze ware ut graaf kwiet van Jonny Schiffer. Zielig veur dae jóng, maar Rapido haet um gelökkig  truuk gevónde.

De sniej en de hagel ware neet besteld, dae véel spontaan.
De temperature ware wat aan de lieëge kant maar in ut hotel waar dao niks van te merke.”
Aansloétend un fototoch door ut stedje. Um 46 gedetailleerde foto’s te vinde woort hiel wat op en neer gerend. Aaf en toe leep ós unne landlouper veur de veut met ziene hónd maar 2 Schepene hele um good in de gate.

’s-Aoves meuste we allemaol aan den bak met ’n act, leedje, versje, zelfs unne Bingo.
Ik weit neet of Bingo in de Middelieuwe al gedaon woort maar ut idee waar prima en brach ouk nog pieke op veur de jubileumkas.

De Doejegravers zoge d’r s’aoves vreej bleik óet maar daags d’rop nao un good óntbijt waar d’r niks mier van te zeen. Violetta makde dit wiekend zien debuut as deilnemer en as zangeres.
Het had un moei Pools leedje meigebrach en haet ós de inhald iers in ut Nederlands óet de deuk gedaon veurdet ut Pools begós te zinge.
Ut achtergróndkuurke hoofde allein maar tössedoor op commando te rope:

Haej Rapido…

Det kin op Dónderdaagaovend beej de training bes good van pas kómme.
Schout en Schepene, names de res van de club weer bedank veur de geslaagde locatie en veur alle veurbereidinge. Un geslaag hotel, lekker doeënbeej hoés, good verzórg aete en fijne kamers.
Bin beniejd of ut jubileumjaor ouk zón verrassing in petto haet!!

6 gedachten over “Rapido wiekend 2019 Alt Kaster”

  2. Ankv

    Ha Elly, de hes weer good dien bes gedaon met ein prachtig verhaol!
    Waat ein leuke gezellige minse op de foto’s!
    Weej hebbe ’t wiekend óntzettend gemis!
    Volgend jaor zien we dor haopelik weer beej!
    Knoevel Jan en @nk

  4. Wiek

    Hoi, ik sloét mich aan beej de weurd van Hay.
    Elly, bedank veur dien leuk verhäölke.
    De foto’s staon meschien neet allemaol op de gooije plaats, maar met ein bietje meujte kin idderein, ouk as se d’r neet beej bis gewaes, oét ’t verhaol en de foto’s wal óntdekke det ’t weer ein tóf, gezellig weekend waas!
    Breurs Smeets bedank!!
    Groetjes,
    Wiek

Laat een reactie achter