Un oor rieje van Venlo in ut Ruhrgebiet leet “Hotel Grunewald” in Dinslaken. De naam is good gekaoze, prima lokatie veur zakenluuj en gemekkelik veur wandelaers en Rapidoleeje. De waergode hadde un wiekend vakantie gepak en de Zón meigenaome. Det waar bale netuurlik want un druuege speurtoch zoot d’r Zaoterdaags neet in.
Nao ut diner vriedaagaovend waar ut effe schrikke. Met unne houp geschrieuw , óngewasse en met sloeberigge kleier aan kwaam “Hölster Heinke” binne gerend. Hae waar erg agressief, had zeker stiekem aan de joeg gezaete in de kelder. De Hotelbaas schrök zich kapot en woel de pliesie al belle. Dae wis natuurlik neet det Hölster Heinke, oftewaal Schinderhannes, unne stroékrover waar dae in 1750 gelaef haet. Frans haet um efkes op de huuegte gebrach en Heinke stevig aangepak en op den trein naor Venlo gezatte. Dao meus dae Vriedaags aantraeje veur de revue, hae waar in elk geval good op tied.
Umdet Zaoterdaags de plensraegen nao ut óntbijt lang aanheel woort ut 1e aafkampspelke alves binne gedaon. Tösse de buuje door hebbe we toch un stökske kinne wandele en alle räödselkes druuég op kinne schriéve. Un euverdekde schuulhut kwaam ónderwaeg good van pas veur un activiteit. Maar zónder paraplu kreeg se toch un behuurlik naat köpke.
Alla, Sportluuj mótte toch flexibel blieve, óngeach de laeftied. We hadde tied zat met ut oplosse van de raodselkes maar allein de óetleg van de breurkes Smeets telt en dao hebbe we dök vraogteikens beej. Toch kreeg unne groep de ierste pries, un lekkere fles wien met eige Rapido-etiket.
Verschillende groepe hadde un veurdrach gemak veur de Zaoterdaagaovend. Yeti, de verschrikkelikke sniejman had zien zóndaags pak aangedaon of…zien moder had toevallig net de was klaor .. Jos haet wat anekdotes verteld euver de aafgeloupe jaore.. D’r is beslis un kwant book te make van 33 jaor rapidowiekende met vuuel foto’s en herinneringe
Herinneringe zien de foto’s van dien laeve.
Adam en Eva kwame ónverwachs op bezeuk en de 2 vertellers deeje efkes óet de deuk wie ut toen allemaol begónne is .
Wat unne appel de waereld kin verandere, óngeluiflik!
Adam en Eva hadde in al die jaore genne kleier-sponsor gevónde maar un paar alde krante zote eur as gegaote. Adam waar extra naor de kapper gewaes um indrök te make op Eva , maar hae bléef erg verlaege,. Allich… wis hae vuuel wie vrouwluuj droét zoge en det Eva zón stök waar!
Det is toch gauw genóg veranderd.
Mieke en Frans hadde op eur bróelof unne ingelse predikant genuuejd , dae eur de kerkelikke zaegen kwaam gaeve. Maar good det de tolk metein alles kós vertale um misverstande te veurkómme. Ze ware net op tied met trouwe want s’morges nao ut óntbijt kwaam Mieke vertelle det ut ‘s-nachs weeje had gekrege en det baby “Rappie” waar gebaore.
Hadde die 2 al maonde véur de broelof geoefend, tja dan kriesse zón verrassing….
Wiek mog met zien leedje neet meidoon op de leedjesaovend in Venlo, Ze hadde gekaoze veur Mai Anröchte…….ouk good! Daorum hebbe weej um gemats en allemaol meigezónge. Ut refrein waar gauw gelierd …….tra la la la …….en kwaam geregeld truuk. Waer of gen waer, ut wiekend is altiéd gezellig met unne gemoedelikke sfeer. Beej deze weer
un kómpliment veur de slumme, de knappe en de alde zoés
In ut veurjaor kinne d’r miér minse mei op wiekend, det is waal zoeë gezellig. Maar Corona luuet zich neet stuure, meschiens nao de volgende boosterprik?
We laote ós volgend jaor verrasse.
Wat weer ein leuk verhäölke Elly!
We hebbe weer genaote.
Lekker gegaete, gedronke, gelache, gezonge, teniel gespeuld.
De 33e kier……..
Elly de hebs d’r weer ’n erg leuk verhaol van gemak en ik dink det minnigein betreurd det hae neet met eige ouge haet gezeen wat dao in Dinslaken is gebeurd.